HOMELIE DE LA MESSE DU JEUDI SAINT (Lâdi)

(KINKALA, LE 17 AVRIL 2014)

Ba Tâta na ba Mâma, Ba ngwala zola ni mbote zeno,…….. !

Lumbu-ti, lumbu kia nsangu kuê beto ba Chrétiens. Bungu bwa-moyo tu tama  sâ, ya mpimpa ya matanga ma mfumu, n’kiêti bu tu vutu wa bambuka moyo kitamana :

« Bu ka bongele dimpa, bu ka vutudi matondo, ni dia ka bukuni, gêni dio kwe bilandi biandi ti : Bongêno lwa dia bebonso, bungu yi ni nitu’ani, yi ganu mu bungu dia beno. Bu ka bongele mpe  mbungu, gêni yo kwê bilandi biandi ti : Bongeno lwa nwa bebonso, bungu yi ni mbungu ya menga mani, menga ma kinkwezi kia mona na kia mankululu, ma tsamuka mu bungu dia beno ».

Mpimpa ni yaûyi, dianga, mfumu Yezu ka gêni kuê bilandi biandi, fuâ di yokele ntalu : mbambukulu moyo ya kabu dia nituandi mankulumanso mu l’Eucharistie.

Tiangu, ka têle yandi bêne mu l’evangile ya Santu Jean ti, kîo ni nguria dimbu tia Luzolo:

« Ka kuena luzolo ko luyokele, na lua wo gâna zingu kiandi mu bungu dia nduku zandi » (Jn 15, 13).

L’Eucharistie ni sacrement ya nkayulu gâ ntî wa la Croix. Ni wô, santu Polo ka zololo ku tu mbambula moyo mu nkanda wa ntêté kuê bisi Korente ti : « Ni mu bungu diô mpê, ntangu ni ntangu yi ludia dimpa dî, na yi lunua mbungu yi, ni mfuilu ya mfumu lutangumunâ, tê ga kakuizi kâdi » (1 Co 11, 26).

Ni dîo bayaya, ntangu zazonso zi tu tundula nsangu za l’Eucharistie, ntêté ni luwilukulu lweto tu fweni fundudîla. Luwilikulu lwô lu tu tama singasala ti, bêto ni bilandi bia yandi wa gâna zingu kiandi mu bungu dia luzolo, ngatu ntî yî, ya kuluka. Bilandi mpê twê bia yandi, wa zolo na tê gâna nsuka. Mboko, bû tu tama dîa nituandi, na bû tu tama nuâ menga mandi, ni mu yimbuka, ngatu ta lenda beto mpê mu gâna zingu kiêto mu bungu dia luzolo lwa bangwala.

Bunô, tu lenda wakasa ti : Luzolo ni ngolo zâ-mosi zi yôkelé, mu kûla ntonto’ansi.

Muntu ni muntu, tama sa bwa-moyo, ya mpindu za l’Eucharistie, nâ tâma sadîla kitantu, mbwimi, Dîki, kêti ta banzila kua yandi bêne, muntu wa mpila yô, ka bakuriêti bunêne bua mpindu za l’Eucharistie kô.

Tiangu, Santu Polo ka têle ti : « Muntu wô tama dîa nitu na tama nûa menga, ni nkassa’andi kâ nwini, talâ kâ kêbelâko » (1Co    ).

Ni n’dimbutulu yi fwananê, mu tambula nitu ya mfumu. Ngatu twa kwama dîa ndéfi ya Luzolo ntangu ni ntangu yi tu tundula nsangu zô.

Bwaûbu bayaya, ti tâ sungamanêti’êno buya-buya bwêto, mu ntangu yi tu fundudîla N’kayulu wâ l’Eucharistie. N’kiêti samu wa tu yuku, wa mana wâ ntalu gâ meso mêto. Kâ, gâ bêlé nga twâ vutu bambukâ moyo, ntangu zazonso ti : kabu ni dîo dîa yimbudi miamionso gâ ntonto’ansi, na dî tu yogêla massembo mu zingu kiêto.

Bayaya, Ntangu ni ntangu, yî tu tundula nsangu za l’Eucharistie, tâbi tâ soba na ta yamuna luzolo mu bêto, luzolo lu fweni yikama, lu fweni tu natîna kiwissa, luvivululu, na bulenvo.

Ni dîo, bayaya, nzololo vutu lu yula : « N’Kî ta kitudi N’kayulu wâ l’Eucharistie?».      

N’kiana bu tu bakuri wô, bêto bêne mu zû dîa nzambi tî, Santu Jean kâ tama zonzela Matanga ma mfumu na bilandi biandi kô, gâ tanduâ mbukununu dimpa. Kâ ni nsukululua malu kua kâ tâ zonzela. Bungu wâ weyi tu wisa na kondi-kondi, kan’kiâ Luzolo Yézu ka tu zololo na tê gâ la Croix. Bunô, nsukululua malu, ni dimbu tîa mîo mîa yilamanê gâna Croix. N’kiêti, buâ têlé Santu Polo kuê bisi Korente ti : « Luzolo wê na lusalusu » (1Co 13, 4)

Nînga bayaya, Tala tî tu tomono zolo, dîeka tu lenda sadisa bagwala na bonso ba tu zololo. N’kîeti bûe luzolo lwâ bibuti mu bala bawu. Kâ tabi ta zabi tî, n’diantulu ya mpila yô, lukosamanu na bulenvo yî tômba. N’kiana bu tama tâ Santu Polo kuê bisi Colosse ti :

« Bêno basôlo ba Nzambi, basemo na bakundi bândi, ki luateno mbanzulu za ngudia Kîambu, za luzolo, za bulemvo, za Dzunu, na za fukî » (Col 3, 12).

Kâ, ndiatulu’êto mu nsî mû, ni mu kuê diatakasê kwâ bangwala. Na mu kwê nwanini kwâ bukuluntu gâ kâti dîeto, kêti kâ nâni yôkele ngolo, kêti mu nwanina bimfumu. Yezu tiangu kâ têle ti :

« luzebi ti mfumu za nsi, mpassi bagandisa bantu bawu, mboko banga m’yalu sôngesa ba kisôngesa ti ni bawu bata tuma. Ka kûe beno, ka dibelandi bô. Ga kati dîeno, wô zolo ba m’kuluntu, ka bâ kisadi kîeno, wô zolo ba matu, ka bâ ngambeno. Mwana muntu mpê ni bô, kayiza kô, ngatu ba m’sadila, kâ mu sadila ba kaka, na mu gâna zingu kiandi, mu kûla kumbu dia bântu » (Mt 20, 25-28).

Yô ni ndongosolo yi tama sen’somoka mu dimbu kia nsukululua malu :

« Ebu lukunta tî meno kilongisi na mfumu. Nzonzoloêno ya mboté, ni bîo djê. Kâ, Tala ti mê djê mfumu ni lusukudi malu, bêno mpê lufueni kukisukula mâlu bêno na bêno. Diangana kifuani nilugêni ngatu bêto mpê luasa nkiêti bu nilusidi mêno » (Jn 13, 11-15).

Ni mu zolo tâ ti : nkayulu wâ l’Eucharistie, nkayulu wâ la Croix, na Nsukululua malu, mpindu ni zimosi kwâ : Mpindu za Luzolo, lwâ nungini mu biabionso.

Kwê Yézu, nsalusu mu bulenvo, kâ yêna betola kô, kêti bungamba, kâ ni nguria Nzila ya bêla n’kuluntu.

Ta tomo’êno dimbitila mpindu zî, za Luzolo, ngatu tâ tomo bakulu salu kiêto mu nsi mû, twâ bê mbangi za tieleka za luzolo lwa Nzambi, lwa monêkene mu Yézu gâ tandua nsukululu malu kwê bilandi biandi, na gâ tandua lufua gâ ntî wa la Croix.   

 Mgr Louis PORTELLA MBUYU

Evêque de Kinkala